ზვიად გამსახურდია – “მთვარის ნიშნობა” (გალაკტიონ ტაბიძისადმი)
არფაზე გაკრული გველი
ჩუმი ნიშნობაა მთვარის.
გათავდა ვარსკვლავთა რთველი
აღმოხდა ცისკარი ჯვარის.
***
მნათობთა ეს სამოსელი
სარკეა ანგელოზთ მხარის
გაბრიელ – ზღურბლისა მცველის
მიქაელ – დამცემი ზარის!
***
ალმასით მორთული სელი,
ტატნობზე – ელვათა ბზარი
ზავდება კამარა ვრცელი
იხსნება ცხოვრების კარი.
***
აფრაზე გაკრული გველი,
ფერისცვალება ქნარის,
ცის გარდაცვალებას ელი,
ახლოა დარობა დარის!