გამოვექეც სიკვდილის ღმერთს

და დავტოვე ბრძოლის ველი,

დავამსხვრიე ბასრი ხმალი,

ჭაბუკ გმირთა სისხლის მსმელი.

***

ახლა ვეძებ სიცოცხლის ღმერთს,

მსურს შევიქმნე მის მეგობრად

და წავიყვან ბრძოლის ველზე,

სიკვდილისა დასაგმობად.

***

ქნარის ჟღერით მე წინ წავალ,

სასიცოცხლოს ვიწყებ მღერას,

ბრძოლით გატაცებულ გმირებს,

მე მოვასმენ ტკბილ სიმთ ჟღერას.

***

მათ სულ ყველას შევიერთებ

და ვამღერებ ჩემთან ერთად,

რომ მთლად დავგმო დრეს სიკვდილი

და სიცოცხლე გვწამდეს ღმერთად.

***

შევაძრწუნებ სიკვდილის ღმერთს,

დღეს ამქვეყნად გამეფებულს,

მთლად დავამსხვრევ მის ბასრ მახვილს,

სასიკვდილოდ გაწოდებულს.

***

და ამ ქვეყნად პირველ ღმერთად,

მე ვიწამებ სიცოცხლის ღმერთს

და ჩემს სუსტ ხმას შევუერთებ,

მებრძოლ გმირთა ურიცხვ გროვას,

დავგმობ ცრემლებს,დავგმობ გლოვას.