და ისევ ისე ქვეყანა ბრუნავს…

და ისევ ისე დრო მიდის,ქრება…

და ისევ ისე,შენს უნებურად,

შენს ნაცვლად სადღაც ვიღაცა კვდება.

***

ან ეწამება შენს ნაცვლად ვიღაც,

სხვას,შენს მაგივრად,ჯვარზე აკრავენ,

შენს ნაცვლად ვიღაც ცლის შხამის ჭიქას,

ანუ მზად არის მოკვდეს ახლავე.

***

შენ ეს არ იცი,შენ ეს არ გესმის,

ვერ ხვდები,ვინ ხარ,ან საით მიხვალ,

სხვა არის შენი ფიქრების მწყემსი,

სხვა ამსხვრევს ყოფნა-არყოფნის ტიხარს.

***

თუმცა უხილავ ჯაჭვით გადაბმულს

ჰგავს ზღვაც და ხმელიც,ვარსკვლავთა კრებაც,

მაინც უშენოდ ქვეყანა ბრუნავს…

მაინც უშენოდ დრო მიდის,ქრება…