მტერთან,

მოყვასთან

ერთნაირი არა მწამს კაცი.

ვინც გულს არ უყვარს,

მის წინაშე შუბლიც მაქვს მკაცრი.

***

მტერი ვარ – მტერმა არ იცოდეს?

ეს არ მოხდება!

გზად შემეყრება,

ცივი მზერა გულზე მოხვდება.

***

ვერ ავუჟღერებ

ავს და კეთილს ერთ ხმაზე სიმებს.

მოყვასს ეკუთვნის,

ტუჩს ღიმილი რომ მიციმციმებს.

***

არა მწამს კაცი,

ფიქრს,ზრახვას რომ

ვერვინ გაუგებს,

არა,ასეთ კაცს

ჩემი გული კარს ვერ გაუღებს.

***

კაცი მწამს წრფელი,

გულახდილი,

ქველი,

ნათელი,

თუნდ რუსი იყოს,

თუნდ თათარი

და თუნდ ქართველი!

***

რომ არ ვთქვა,რა ვქნა,

გადმოხეთა სიტყვამ ნაპირი:

დავბადებულვარ

გულახდილი და პირდაპირი

და ეს,არ ვიცი,

დამღუპავს თუ მთლად ამაშენებს…

ერთი კი ვიცი:

ეს ის არის,

კაცს რომ ამშვენებს!