ხორცმა რა მიყო ვაიმე: სულიც კი მომაძულაო,

ამაო სიბილწისათვის მარადის მომაწყურაო,

შავი ბოროტი მაყვარა,ანგელოზთ მომამდურაო,

ბოლოს მარცხვინა კრებაში, სუდარაც დამახურაო.

***

ხორცმა რა მიყო ვაიმე: პირველად მომეფერაო

ოდეს იძლია ცოდვითა,არცა რა დამიჯერაო

სული ნათლისა განაგდო,სრულიად დაემტვერაო

ბოლოს მარცხვინა,კუბოცა თავზედა დამახურაო.

***

ხორცმა რა მიყო ვაიმე: ნდომითა გამახურაო,

გემოთ სურვილი ჩამაცვა,შემკრა და შემაჭურვაო,

ბილწი ნაღველი მიმზადა,უფლებით ჩამაწურაო,

ბოლოს მარცხვინა საწყალი,მატლებიც დამაცურაო.

***

ხორცმა რა მიყო ვაიმე: შუა ზღვაში შემაცურაო,

ღელვა ატეხა ფიცხელი,ჰაერსაც არ მაყურაო,

მლაშე წყალითა მახრჩობდა,ცვარიცა არ მასხურაო,

ბოლოს მარცხვინა აყროლდა,ოჯახმაც მომიძულაო.

***

ხორცმა რა მიყო ვაიმე: იმძლავრა სახის მშვენითა,

შური-მტერობით მამყოფა,ურთიერთისა კბენითა,

აღთქმა მავიწყა ნათლისა,ცოდვას მაჩვია ფრენითა,

ბოლოს მარცხვინა საფლავში,მარტო დამტოვა ბნელითა.