არჩილ სულაკაური – “მხოლოდ ერთხელ”
მინდა,ზვრები გაზაფხულის
ღრუბლებს მოვაწვიმინო.
ვაი,რა შორს გაფრენილა
ჩემი ჟღალი მიმინო?!
* * *
მივდივარ და სად მივდივარ,
სადაური საითა?
ლელო ერთხელ გავიტანე,
განა კიდევ გავიტან?!
* * *
გუმბათს ერთხელ ჩამოვკიდე
მოგუგუნე ზარები
და დარუბანდს მხოლოდ ერთხელ
ჩამოვხსენი კარები.
* * *
მხოლოდ ერთხელ აღვაშენე
სვეტიცხოვლის ტაძარი
და ლაშქარი დიდგორისკენ
მხოლოდ ერთხელ დავძარი.
* * *
მხოლოდ ერთხელ დამესიზმრა
სიყვარულის სიზმარი
და გამეხსნა მხოლოდ ერთხელ
კარნი სამოთხისანი.
* * *
მინდა,ზვრები გაზაფხულის
ღრუბლებს მოვაწვიმინო,
ვაი,რა შორს გაფრენილა
ჩემი ჟღალი მიმინო?!
* * *
ახლა გუმბათს მან დაჰკიდოს
მოგუგუნე ზარები
და დარუბანდს ახლა ერთხელ
მან ჩამოხსნას კარები!
* * *
სადაური სად გაფრინდა,
ვის ცერზე ზის ტიალი,
ვის შეუდგა და ვის ასმევს
შარბათს ოქროს ფიალით?
* * *
ახლა სხვამან აღაშენოს
სვეტიცხოვლის ტაძარი
და ლაშქარი დასძრას დიდგორს,
როგორც ერთხელ დავძარი!
* * *
ახლა სხვასაც დაესიზმროს
სიყვარულის სიზმარი
და განეხსნეს ერთხელ სხვასაც
კარნი სამოთხისანი!
* * *
მინდა,ზვრები გაზაფხულის
ღრუბლებს მოვაწვიმინო,
ვაი,მხარში დაუჭიათ
ჩემი ჟღალი მიმინო!