სიმონ ჩიქოვანი – „ამ ოც წელში გზა გავლიეთ წყვილად”

ამ ოც წელში გზა გავლიეთ წყვილად,

მთა და ბარში ხვეული და სწორი.

მთაში ბევრგზის შეგვხვდა დილა,

კართან ბევრგზის მოგვეწია თქორი,

მოგვაფრქვია სიხალისე,

ჩამოგვრეცხა მტრის შური და ჭორი,

და შენ შემრჩი ხელში ისე,

როგორც ვაზი ან ლამაზი ქორი.

* * *

ორი ფრთა გაქვს, ერთი კვამლი,

ორი ბეჭდის გადაწნილი ზოლი.

შენს თვალში ჩანს ცისკრის ჭავლი,

ჩემს თმაზე დევს გაზაფხულის თოვლი.

* * *

დრო მიჰქრის და მაიმედებ,

ცხენს მიკაზმავ თუ მიჭედავ ნალებს,

წლები ჰგვანან განვლილ ქედებს

და სახლი ჰგავს შენი ხელის ალერსს.

* * *

მეც არ მჯერა თუ მოვხუცდი,

არ ვისვენებ, არ დამედოს ქონი.

შენს ჭაღარას მე მოვუცდი

და მერე კი დავბერდები, მგონი.

* * *

მარგე სითბო და სინაზე,

ნასადილევს უსიზმრებო ძილი.

მტკვარი გვიზის აივანზე

და მამულში წყვილად შეგვაქვს წვლილი.

* * *

რაც შეგვეძლო, გავისარჯეთ,

მე ლექსს ვწერდი, შენ გზავნიდი წერილს,

კიდევ ბევრჯერ გავალთ გზაზე,

რომ მეგობრებს არ ჩამოვრჩეთ მერმისს.

* * *

თუ დაგვჭირდა, შევმჭიდროვდეთ,

ხელისგულზე მოვთავსდებით მყისვე,

ღამე ვარსკვლავს ვეჭიდები

და შენს სუნთქვას, ვით წყაროს ხმას, ვისმენ.

* * *

მეც შემეძლო ჩეხვა შეშის,

მთაში ირმის შეპყრობა თუ ჯიხვის,

ცდა და ღელვა მოსახვევში,

ოფლის დაღვრა და გალხობა ჭირხლის.

* * *

დღეს შენ მიღებ სახლის კარებს,

ფანჯარასთან მე მიცდი თუ ქუხილს?

გამკრავ ქარში მომეფარე,

არ შეუშვა შინ წვიმები მწუხრის.

* * *

არ მოედო სადმე ეკალს,

როცა გზაზე სწყვეტ ეკალს თუ ყვავილს.

ხანდაზმული გრძნობა რეკავს,

მწუხრი რეკავს და ცისკარი ხვალის.

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

შეგიძლიათ გამოიყენოთ ეს HTML ტეგები და ატრიბუტები: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>