ტარიელ ჭანტურია – „აკაკის წამოსვლა ქუთაისიდან”
შენ რომ წადი, წყალწითელამ
თვალი ცრემლით დაისია!
განშორება არ იგლოვოს -
აბა, რა ქუთაისია!
* * *
შენ რომ წადი, თამარელამ
თვალი ცრემლით დაისია;
შენთან ყოფნა – დილა იყო,
უშენობა – დაისია!
* * *
სათაფლიას მოწყენილი
ბულბულები დაესია!
შენთვის ტირის წყალწითელა -
თვალი ცრემლით დაისია.
* * *
რა იოლად ჩამომჭკნარა
ის მიმოზა და ის ია!
უშენობა არ დაეტყოს -
აბა, რა ქუთაისია!..