ტარიელ ჭანტურია – „ტრაქტატი ლექსად”
კარგი ლექსების წერას რა უნდა!
განა სასახლე, განა სრა უნდა!
ან ხელმწიფესთან მიმოსვლა უნდა -
წერის დროს სულის ამოსვლა უნდა!
* * *
ზოგს რომ ჰგონია, ფულის ჭრა უნდა,
ან სამოწყალოდ – ძვალის ხრა უნდა!
კალმიდან – სისხლის გამოსვლა უნდა.
თასიდან – შხამის გამოცლა უნდა!
* * *
კაი ლექსების წერას რა უნდა!
გულზე საფლავის ლოდის ძვრა უნდა!
გულში ამურის ისრის კვრა უნდა!
სულ ტკივილიან ჩანგის კვრა უნდა!
* * *
კაი ლექსების წერას რა უნდა!
ზოგჯერ – მოწყენა, ზოგჯერ – სმა უნდა!
კაი ხმა უნდა! კაი ზმა უნდა!
მუდამ მართალი სიტყვის თქმა უნდა!
* * *
კაი ლექსების წერას რა უნდა!
განა ჯილდო და ტაშის კვრა უნდა!
განა შური და კაცის კვლა უნდა!
კუნაპეტ ღამის გაცისკვრა უნდა!
* * *
კაი ლექსების წერას რა უნდა!..