ტარიელ ჭანტურია – „კუთხის კრამიტი ვანის ქალაქიდან”
მეათასედ ვეკითხები
ხსოვნას – ჯიუტ რესტავრატორს:
- რატომ დაიღუპა თმოგვი
და ქორსატეველა, რატომ?
* * *
ვით ვერ დაიფარეს მცხეთა
მთამ მაღალმა… ცამ უზადომ…
რატომ დაიღუპა ბანა
და არმაზის ციხე, რატომ!
* * *
ყველა ხონთქარს, ყველა ყაენს,
ყველა შაჰს და იმპერატორს
რატომ ვერ უკლავდა წყურვილს
სისხლი ქართველისა, რატომ!
* * *
რად შეცვალა ჯემმა – მარწყვი,
და ძელქვები – ავოკადომ!
ან ეს სტრიქონები რატომ
დაიწერა! რატომ, რატომ…