„ხალხის ბატონი ის არის, ვინც მისივე მსახურია”. – (ავტორი გენია.ჯი)

* * *

„საკაცობრიო პირველობის ავადმყოფობით ბევრი ერი რიგ-რიგობით ავადდებოდა, რამეთუ ის საკაცობრიო პირველობა არის უკურნებელი და მარადიულად გარდამავალი სენი თვით კაცობრიობისა”.

* * *

„ქრთამი და ძღვენი ერთია, ოღონდ სიტყვებს ასდის სხვადასხვანაირი სუნი”.

* * *

„რაც ერთხელ წავა, ვერ მობრუნდება, რამეთუ გარდასული და გარდაცვლილი ერთი ყოფილა ამ მადლიან წუთისოფელში”.

* * *

„მართლაც დიდი უბედურებაა კაცისა, როცა საკუთარი ტყუილი თვითონვე სჯერა”. – (ავტორი გენია.ჯი)

* * *

„კაცობრიობის ისტორიაში დიდ ლაშქრობებსა და ომებზე ნაკლებს როდი აღწევდნენ უძლეველნი თუ უნდილი გაიძვერანი ამა ქვეყნისანი”.

* * *

„ქვეყნიერება არასოდეს არ ყოფილა ერთი ერისა და სახელმწიფოს ბატონობის ქვეშ, რამეთუ ყველა აღიარებული ბატონობაც კი ყოველთვის შემოიფარგლებოდა ქვეყნიერების დიდი თუ მცირე რეგიონით ან რეგიონებით, სრულიად კი არასოდეს არ უმძლავრია არავის – არცა ბერძნებს, არცა რომაელთ, არცა პორტუგალიელთ, არცა ესპანელთ, ფრანგთა თუ ინგლისელთ…”

* * *

„მთვარე უვარსკვლავებოდ ზეციერ ციმციმს არის მოკლებული”.

* * *

„ყოველი ჭეშმარიტი მამულიშვილი ვალდებული არის იფიქროს ქართული ენის შესახებ და შეძლებისამებრ ზრუნვაც არ მოაკლოს. უმჯობესია იმ ფიქრსა და ზრუნვაში შეცდეს, ვიდრე შეუცდომლად გატრუნულმა გულგრილად უყუროს მის აწმყოსა და მომავალს”.

* * *

„სიტყვის უადგილოდ ხმარება ადამიანის განუსწავლელობის ან დაუდევრობის ერთი ნიშანია”. – (ავტორი გენია.ჯი)